Чеди-хөлчүлерге, октябрь 1-ниң хүнү, онзагай төөгүлүг хүн болуп эрткен. Ол хүн кожуун төвү, Хову-Аксыга, тыва чечен чогаалдың дөрткү салгалының төлээзи, Россияның чогаалчылар болгаш журналистер эвилелдериниң кежигүнү, тускай, онзагай салым-чаянныг үннүг бедик Мөңгүн-Тайганың чараш, сагыш-сеткили омак-сергек, уян кээргээчел чүректиг, эриг-баарлыг, могаг-шылаг чок, бурунгаар көрүштүг эне чогаалчыларывыстың бирээзи, Лидия Херлииевна Иргит аалдап келген.
Каш-ла хонук бурунгаар-ла Лидия Херлииевна амыдыралының чеденги арттының кырында теп үнүп келген. Ол мугур хар харлаанын, Тываның национал А.Пушкин аттыг ном санынга, чогаалчы, журналист эш-өөрү-биле солун, магадалдыг ужуражылганы байырлап, демдеглээн. А октябрь айның 1-де, бүгү делегейниң хоочуннар хүнү таварыштыр, Лидия Херлииевна бистиң чалалгавысты хүлээп, чеди-хөлчүлерге уттундурбас солун ужуражылганы эрттирген.
Лидия Херлииевна ужуражылгаже кээрде, чааскаан келбээн. Ол кады ажылдап турар чогаалчы эш-өөрү Ооржак Лидия Хорагайевна база Донгак Родион Маадыр-оолович суглар-биле аалдап келгеннер.
